السلام عليكم
طبعا انا زيى زيكم قلبى واجعنى والقلق عامل عمايله فينا
يمكن مش وقت الفيشار والحاجات دى
بس الاجازة مدوها اسبوع والولاد قاعدين فى البيت
وكل يوم فيشار وقاعدين نخترع نكهات مختلفة
خاصة فى الاسبوع الاول كانو محبوسين ومافيش نت والتليفزيون اخبار سودة طول النهار
حبيت اقوللكم عليها يمكن تعملوها للولاد
كفاية رغى نخش فى الموضوع
1- فيشار بالكارى
طعمه تحفة اخدت الفكرة من موضوع تكات الطبخ بتاع كاتى
كانت واحدة بتعمل الفيشار بمرقة الدجاج الفورية وانا زودت عليها الكارى
المقادير
نصف كوب ذرة فيشار+ربع كوب زيت نباتى +كيس مرقة فورية + 1م ك كارى +ربع م ملح
الطريقة
نسخن الزيت كويس فى الحلة وبعدين نضيف الذرة ونقلب مرة وبعدين نضيف خليط مجهزينه من المرقة والكارى والملح ونقلب كمان مرة ونغطى الحلة بسرعة وتكون النار عاليه عشان الفيشار يطقطق بسرعة وقبل ما يخلص طقطقة نطفى النار ونسيبه هيكمل لوحده
لكن لو هدينا النار الطقطقة هتتاخر والفيشار اللى تحت هيتحرق قبل الباقى ما يطقطق
وبالهنا والشفا
2- فيشار بالشطة والليمون
بنفس الطريقة هنجهز عصير الليمون الاول وبعد ما الزيت يسخن وننزل بالذرة نضيف عصير نصف ليمونة والشطة ونقلب ونغطى
وطعمه تحفة بس متكتروش الشطة هو بياخد وقت عالنار اكتر لحد العصير ما ينشف ولما ينزل من عالنار بيبئى ناشف شوية بس بعد ما يبرد بيقرمش ويبئى لذيذ اوى
وبالهنا والشفا
فيشار بالجبنة
انا لسه هجربه بس قلت اقوللكم عليه بالمرة
وهو هنعمل الفيشار عادى بالزيت ومن غير ملح وبعد ما يستوى نقلب عليه وهو سخن جبنة رومى قديمة مفرومة فى مطحنة الخلاط وناعمة وطبعا هيمسك فيها الفيشار وهو سخن وان شاء الله تطلع حلوة
وبالهنا والشفا[b]
الإثنين 12 مارس 2012, 11:00 am
اليومية
